الكابـــــــــــــــــــــــــــــــــوس

المشهد الأول - كابوس رقم 1:

نهار داخلي..حجرة أحد الطلبة الفاشلين..ليلة الأمتحان..قبل الفجر:

فاكره إن لسه بدري ع الأمتحان.. وطبعاً لسه مذكرتش حاجة ولا فتحت كتاب.. وفجأة .. ألقي في روعي -وماتقولش يعني إيه روعي؟- إن فاضل كام ساعة ع الأمتحان .. يا نهار أسود..مرة واحدة كده؟؟ .. ده أنا لسه ما ذاكرتش .. حاولت أقرأ أي حاجة بسرعة .. بس القراية بطيئة .. والكلام كتيييير .. والوقت بيجري بسرعة .. وأنا بنهج .. ونفسي بيروح .. وعايزه أصرخ .. أصرخ...

لأاااااه ه....... (cut)

أصحا من النوم مفزوعه لأجد أن الأمتحان لسه مجاش!!.

المشهد الثاني - كابوس رقم 2 :

برضه نهار بس خارجي المره دي .. راكبه المشروع والسواق راجل عجوز .. دايس ع البنزين بطرطوفة صوبع رجله الصغير وعمال يكحكح وشكله بيموت أساساً .. عداد السرعة بيقرا 3 متر في الساعة .. وأنا بصرخ يا عم: أسرع أبوس رجلك فاضل خمس دقايق ع الأمتحان .. الوقت بيجري .. أنزل م المشروع وأقعد أجري في الشارع .. أجري .. لكن رجلي ما بتجريش .. والأسفلت بيتحــول لرملة .. ورجلي بتغرز في الرملــة .. وبنهج .. بنهج .. ونفســي بيــروح .. وبصرخ .. بصرخ .. لأاااااااااه ه ......(cut)

أصحا من النوم مفجوعه لأجد أن "برضه الأمتحان لسه ما جــاش"!.

المشهد الثالث - كابوس رقم 3 :

نهار داخلــي .. نفس الحجرة بتاعة كابوس رقم 1 .. نايمه على السرير غارقه فــي نوم عميق .. وفجأة يرن جرس المنبه .. أصـحى مفزوعه على صــوته المزعج .. أنظر في الساعة .. يا نهار أسود الساعة 12 .. ده أنا أمتحاني الساعة 9 .. أنا كده الأمتحان فاتني .. أنا سقطت .. صدري بيضيق ..نفسي بيروح .. عايزه أصــرخ .. أصــرخ ..لأااااااااااه ه .......(cut).. زي كل مرة طلعت فطشة

المشهد الرابع - كابوس رقم 4 :

نهار خارجي .. بجري جوه كليتي عشان ألحق الأمتحان لكن المرة دي كنت عارفه ميعاد الأمتحان .. ومارحتش عليا نومة ..ولا أتأخرت ع الأمتحان .. كل حاجة المرة دي ماشية مظبوط ..

وصلت إلى اللجنة في هدوء .. تركت حاجتي ع الباب واقتربت منها ولسه هدخل لقيت المراقب بيقولي:

- رايحه فين يا انسه؟؟

- هي مش دي كلية تجارة؟؟

- أيوة

- امتحان المحاسبة سنة تالتة

- تمام ..

- طيب عايزه أدخل

- لا.. تدخلى فين؟؟ .. (ثم يبتسم ابتسامة صفراء) ثم قال : مفيش مكان

- مفيش إيه؟؟!!!!

- مفيش مكان..

- إيه الجنان ده؟؟ .. هو انا بركب مشروع عشان تقولي مفيش مكان؟؟

- مشروع .. أتوبيس .. قولتلك مفيش مكان ..يعني مفيش مكان

- يا عم ده أنا معايا رقم جلوس

- والله لو معاكى بسبور..برضه مفيش مكان

- طب أروح دلوقتي ولا أعمل إيه

- أطلعى على مبنى العميد يمكن تلاقيلك مكان هناك

أخدتها جري وطلعت على مبنى العميد .. لقيت أمة لا إله إلا الله واقفة

- إيه يا جدعان .. هو إيه النظام؟؟

- والله مستنيين

- مستنيين إيه بالظبط؟؟

- مستنيين أي حد يخلّص عشان حد يخش مكانه

- إيه يا جدعان .. هية ميضة؟؟ .. ده امتحان .. يعني ممكن محدش يخرج إلا في آخر الوقت

- والله أدينا مستنيين .. أدعي بس أنتى ربنا يسهل للي جوه..

وأخذ الجميع يهتف في صوت واحد .. يا لطيف .. يا لطيف.. وبعد كتير من الدعاء ولاابتهالات مثل يا مسهل سهلها .. وانتعهم بالسلامة يا رب .. وبعد مرور معظم الوقت .. ربنا سهل لواحد ودخلت أنا مكانه .. كتبت اسمي على ورقة الإجابة ورقم جلوسي ولسه هقول يا هادي لقيت اللي يقولي "ضع القلم" ..بيني وبينكم أنا كنت عايزه أضع القلم في عينه .. لكن استخسرت القلم .. قعدت أنهج .. ونفسي يروح .. وأصرخ .. أصرخ .. لأااااه ه.. لكن محدش قال: (cut) .. ولا صحيت م النوم .. ذلك لأنه كان بالفعل كابوس حقيقي.

شـكــ وبارك الله فيك ـــرا لك ... لك مني أجمل تحية